Şəmkirin Kür qəsəbəsində körpələr evi-uşaq bağçası istifadəyə verilib+Fotolar

Bu gün Şəmkir rayonunun Kür qəsəbəsində Heydər Əliyev Fondunun təşəbbüsü ilə əsaslı təmir edilən körpələr evi-uşaq bağçasının açılışı olub.

240 yerlik körpələr evi-uşaq bağçasında 2 yaşından 6 yaşınadək olan uşaqlara təhsilin ilkin mərhələsi tədris ediləcək. Azyaşlı sakinlərin zövqünə uyğun qurulan bağçada onların rahatlığını, istirahətini və ilkin biliklərə yiyələnməsini təmin etmək üçün şərait yaradılıb və müvafiq inventarla təchiz edilib.

Burada müxtəlif yaş qrupları üçün məşğələ otağı, rəsm, idman və musiqi zalları, yeməkxana var. Uşaqların maraqları nəzərə alınaraq bağçanın həyətində müxtəlif istirahət guşələri yaradılıb.

Tədbirdə son illər ölkəmizdə məktəbəqədər təhsil müəssisələrinin maddi-texniki bazasının möhkəmləndirilməsi istiqamətində həyata keçirilən tədbirlər barədə məlumat verilib.
Bu gün uşaqların keyfiyyətli təhsil və qayğı ilə əhatə olunması, onlar üçün zəruri şəraitin yaradılması, böyüməkdə olan nəslin layiqli vətəndaş kimi formalaşması Azərbaycanda dövlət siyasətinin başlıca prinsiplərindəndir deyən Şəmkir Rayon İcra Hakimiyyətinin başçısı Alimpaşa Məmmədov qeyd edib ki, son illər ərzində respublikamızda yüzlərlə uşaq bağçası və körpələr evlərinin tikilməsi, bir çoxunun isə yenidən bərpası ölkədə uşaqlara göstərilən diqqət və qayğının tərkib hissəsi olmaqla yanaşı həm də Azərbaycan gələcəyinin daha etibarlı təminatına geniş imkanlar açıb. O, Azərbaycanın Birinci vitse-prezidenti Mehriban Əliyevanın rəhbərliyi ilə Heydər Əliyev Fondu tərəfindən təhsil sahəsində həyata keçirilən layihələr barədə məlumat verib.

Şəmkirdə həmçinin Heydər Əliyev Fondunun təşəbbüsü ilə yeni inşa edilmiş 5 saylı körpələr evi-uşaq bağçasının açılışı olub.

Tədbirdə çıxış edənlər Azərbaycan Prezidenti İlham Əliyevin və Birinci vitse-prezident Mehriban Əliyevanın məktəbəqədər təhsilə göstərdiyi diqqət və qayğından, bu istiqamətdə görülən işlərdən və körpələr üçün yaradılan şəraitdən danışıblar. Bildirilib ki, 5 saylı körpələr evi-uşaq bağçası 75 yerlikdir və müasir avadanlıqlarla təchiz olunub, burada körpələrin məktəbəqədər təhsili üçün şərait yaradılıb.

.

DunyaninSesi.AZ