İranın Fəcr Kino Festivalında ‘türkcə film’ polemikası
İranın Fəcr Kino Festivalında nümayiş etdirilən türkcə-farsca “Atabay” filminin mətbuat konfransında qızğın mübahisə yaşanıb. Ssenarist Hadi Hicazifər filmin türk dilində çəkilməsinə etiraz edən jurnalistə deyib ki, “düşüncələrin faşist düşüncədir.”
Mən səninlə bir türk olaraq danışıram. Filmin yazarı olaraq danışıram. Sənin düşüncən faşist düşüncədir.Hadi Hicazifər
Qərbi Azərbaycan vilayətinin Xoy şəhərində türk və fars dillərində çəkilmiş Atabay filmi xüsusilə rejissor və prodüseri olan Niki Kərimi sayəsində İran mətbuatı və kino sevərlərin diqqət mərkəzindədir. Atabay filmi aktrisa kimi beynəlxalq şöhrət qazanmış Niki Kəriminin rejissor olaraq çəkdiyi beşinci kinofilmdir.
Filmin mətbuat konfransı cümə günü 38-ci Fəcr Kino Festivalının 7-ci günündə keçirilib. Mətbuat konfransında kino jurnalisti Əmir Fərzullahi filmin türk dilində çəkilməsinə etirazını bildirib.
Kim demiş ki, biz hökmən fars dilində film çəkməliyik?Niki Kərimi
Jurnalist soruşub: “İranın rəsmi dili farscadır. Bu necə bir film istehsalıdır ki, iranlı izləyici bir İran filmini İranda farsca altyazı ilə izləməli olur?”
Rejissor Niki Kərimi İranda danışılan müxtəlif dillərdə kifayət qədər film çəklimədiyini önə çəkib.
“Əslində mən bunu qəbul etmirəm ki, filmlərin dili mütləq farsca olmalıdır. Hətta mənim fikrimə görə, biz İranda mövcud olan müxtəlif dillərdə çox az çalışmışıq. Kim deyib ki, biz hökmən fars dilində film çəkməliyik?” – İranın fil sənayesinin məşhur ulduzu söyləyib.
Atabay filminin ssenaristi və baş rol ifaçısı Hadi Hicazifər isə jurnalistin düşüncəsini “faşist düşüncə” olaraq dəyərləndirib.
“Mən səninlə bir türk olaraq danışıram. Filmin yazarı olaraq danışıram. Sənin düşüncən faşist düşüncədir… Sənin və başqa heç kimsənin türk dilini aşağılamağa haqqı yoxdur. İranın konstitusiyasına görə, türk ədəbiyyatı universitetdə türk dilində tədris edilməlidir. Mən sizə təəssüf edirəm, və tərəddüdsüz deyirəm ki, baxışın faşist baxışdır. Bunu yüksək səslə deyirəm. Bu ortaya çıxan separatçılıq düşüncələri də bu baxışın məhsuludur,” Hadi Hicazifər ifadə edib.
